తన అభిమాన నాయకుడు జగన్ మోహన్ రెడ్డి జోలికి వస్తే జనసేన అధ్యక్షుడు పవన్ కళ్యాణ్ ని చంపేస్తా అంటూ ఒక రౌడీ అభిమాని ఫేస్ బుక్ లో పెట్టిన వీడియో కలకలం సృష్టించింది. పైగా ఆ పెట్టిన అభిమాని తియ్యగూర వెంకటరెడ్డి రెండు హత్య కేసులలో నిందితుడు కావడంతో పవన్ కళ్యాణ్ అభిమానులలో కలకలం మొదలయ్యింది.
పవన్ కళ్యాణ్ మీద పెట్టిన వీడియోలో దూషణలు, అసభ్య పదజాలాలు కూడా ఉన్నాయి. జగనన్న జోలికి వస్తే ప్రాణాలు తీయడానికైనా ఇవ్వడానికైనా సిద్ధం అన్న వ్యాఖ్యలతో ఉన్న వీడియో సోషల్ మీడియాలో వైరల్ అయ్యింది. గుంటూరు నేలపాడు పోలీసులు కేసును సుమోటోగా స్వీకరించి వెంకటరెడ్డిని అరెస్ట్ చేసారు.
తియ్యగూర వెంకటరెడ్డి హీరో నితిన్ రెడ్డి, దర్శకుడు ఎస్. వీ. కృష్ణ రెడ్డి ఆల్ ఇండియా అభిమానుల సంఘం అధ్యక్షుడిగా ఉన్నారు. ఇక్కడ ఆసక్తికరమైనది ఏమంటే హీరో నితిన్ పవన్ కళ్యాణ్ వీరాభిమానిగా మన అందరికి తెలిసిందే. నేలపాడు పోలీసులు అతని మీద రౌడీ షీట్ తెరిచారు.
