హారిస్ జయరాజ్ సంగీతం అందించిన ‘ఇరుముగాన్’ సినిమా ఆడియో ఆగష్టు 2వ తేదీన విడుదల కానున్న నేపధ్యంలో… ఈ సినిమాకు సంబంధించిన పోస్టర్లు అత్యంత ఆకర్షణీయంగా, వీక్షకులను కట్టిపడేసేలా రూపుదిద్దుకుంటున్నాయి. ఇటీవల కాలంలో బీచ్ ఒడ్డున ‘చియాన్’ విక్రమ్, నయనతారల ఫోటో హల్చల్ చేసి, టాక్ ఆఫ్ టౌన్ గా మారగా, తాజాగా ఈ సినిమాకు సంబంధించి మరో ఫోటో సోషల్ మీడియాలో సందడి చేస్తోంది.
గన్ పట్టుకుని చియాన్… ఆ వెనుక హోయలు పోతూ నడుస్తున్న నయనతారలు ఉన్న స్టిల్ స్టైలిష్ గా, వీక్షకులను ఆకట్టుకునే విధంగా ఉంది. ఇప్పటికే విడుదలైన రెండు టీజర్లు ఈ సినిమా చాలా స్టైలిష్ గా తెరకెక్కిందన్న విషయాన్ని స్పష్టం చేసాయి. తాజాగా సోషల్ మీడియాలో హల్చల్ చేస్తున్న ఫోటోలు కూడా ఈ విషయాన్ని ధృవీకరిస్తున్నాయి.
తమిళంలో ‘ఇరుముగాన్’గా ఉన్న సినిమా తెలుగులో ‘ఇంకొక్కడు’ పేరుతో డబ్ అవుతున్న విషయం తెలిసిందే. ఆనంద్ శంకర్ దర్శకత్వం వహిస్తుండగా, విజయ్ తో ‘పులి’ వంటి భారీ బడ్జెట్ సినిమాను నిర్మించిన శిబు థామీన్స్ ఈ సినిమాకు నిర్మాత. విక్రమ్ కెరీర్ లో మరో ప్రయోగాత్మక సినిమాగా ఈ యాక్షన్ థ్రిల్లర్ ‘ఇంకొక్కడు’ నిలిచిపోవడం ఖాయం అంటున్నారు ‘చియాన్’ అభిమానులు.