టాలీవుడ్ లో లీకుల పర్వం కలకలం సృష్టిస్తోంది. ఈ నెల 15వ తేదీన విడుదల కాబోతున్న “గీత గోవిందం” సినిమాలోని పలు సన్నివేశాలతో పాటు సినిమా మొత్తం పెన్ డ్రైవ్ లలో సర్క్యూలేట్ అవుతోందన్న సమాచారం హీరో విజయ్ దేవరకొండకు కన్నీరు తెప్పించగా, తాజాగా అదే హీరో నటించిన “టాక్సీవాలా” సినిమా కూడా పూర్తిగా లీక్ అయ్యిందన్న సమాచారం సోషల్ మీడియాలో హల్చల్ చేస్తోంది.
అంతేకాదు దీనికి సాక్ష్యంగా ఈ సినిమాకు సంబంధించిన అన్ ఎడిటెడ్ పిక్స్ ను సోషల్ మీడియాలో పోస్ట్ చేయడం మరింత బలాన్ని చేకూరుస్తోంది. హెచ్.డి.క్వాలిటీ ఉన్న ఈ పిక్స్ లో హీరో విజయ్ దేవరకొండతో పాటు మరో ఇద్దరు కమెడియన్లు ఉన్నారు. ఈ లీకుల పర్వంతో ఒక్కసారిగా తాను డౌన్ అయిపోయానని దేవరకొండ ట్విట్టర్ వేదికగా కన్నీటి పర్యంతం అయ్యారు. అలాగే కోపం కూడా వస్తోందని ఒకింత ఆగ్రహం వ్యక్తం చేసారు.
“గీత గోవిందం, టాక్సీవాలా” సినిమా లీకుల పరిస్థితి ఇలా ఉంటే, మరోవైపు “అరవింద సమేత” సినిమాకు సంబంధించిన వీడియో, ఫోటోలు కూడా లీక్ అయ్యాయి. ఇందులో ప్రధాన సూత్రధారి అయిన ఎడిటర్ ను అరెస్ట్ చేసారు. అయితే ఇలా ఒకదాని వెనుక మరొకటి లీకులు కావడం వెనుక టాలీవుడ్ పరిశ్రమ కృంగిపోతోంది. దీంతో నేడు జరగబోతోన్న ప్రీ రిలీజ్ ఈవెంట్ లో హీరో విజయ్ దేవరకొండ ప్రసంగం ఎలా ఉండబోతోందో అన్న ఆసక్తి సర్వత్రా నెలకొంది.
