తన కెరీర్ లో ఎంతో ప్రతిష్టాత్మకమైన 25వ సినిమా టీజర్ ను ఈ విజయదశమి సందర్భంగా విడుదల చేయబోతున్నామని హీరో సుమంత్ ప్రకటించాడు. “సుబ్రహ్మణ్యపురం” పేరుతో రూపుదిద్దుకుంటోన్న ఈ సినిమా టీజర్ ను అక్టోబర్ 19వ తేదీన విడుదల చేయబోతున్నట్లుగా సోషల్ మీడియా ద్వారా సుమంత్ ప్రకటించాడు.
అక్కినేని కాంపౌండ్ నుండి వచ్చిన ఈ హీరో కెరీర్ లో విజయాల కంటే పరాజయాలే ఎక్కువగా పలకరించాయి. కానీ “సుబ్రహ్మణ్యపురం” పేరుతో తెరకెక్కుతోన్న ఈ 25వ సినిమాపై మొదటి నుండి పాజిటివ్ టాక్ నెలకొంది. బహుశా దసరాకు విడుదల కాబోతోన్న ఈ టీజర్ విడుదలైన తర్వాత మరింత స్పష్టత రావడం ఖాయం.
సంతోష్ జాగర్లపూడి దర్శకత్వం వహిస్తోన్న ఈ సినిమాను బీరం సుధాకర్ రెడ్డి నిర్మిస్తున్నారు. టీజర్ విడుదలను పురస్కరించుకుని విడుదల చేసిన పోస్టర్ నెటిజన్లను ఆకర్షిస్తోంది. సుబ్రహ్మణ్యస్వామి కధ నేపధ్యంలో గతంలో నిఖిల్ హీరోగా వచ్చిన ‘కార్తీకేయ’ బంపర్ హిట్ గా నిలిచిన విషయం తెలిసిందే.
