ఒకప్పుడు చాలా సైలెంట్ గా తన పని తాను చేసుకుంటూ మీడియాకు దూరంగా ఉండే గాయని సునీత, ఇటీవల కాలంలో ఏదొక రూపేణా వార్తల్లో నిలుస్తుండడం విశేషం. తన భర్త విషయంలో స్పష్టత ఇచ్చిన సమయంలో సునీత పేరు మీడియా వర్గాల్లో హాట్ హాట్ గా హల్చల్ చేయగా, తాజాగా ఓ మీడియా ఛానల్ కు ఇచ్చిన ఇంటర్వ్యూలో గతంలో తాను బాధపడిన ఓ యూ ట్యూబ్ వీడియో గురించి ప్రస్తావించారు.
‘సునీత కూతుర్ని చూసారా… కత్తిలా ఉంది…’ అనే టైటిల్ తో యూ ట్యూబ్ లో ఓ వీడియోను పోస్ట్ చేసారని, నా కూతురిని కామెంట్ చేయడానికి వాళ్ళెవరు? నేను, నా పిల్లలు ఉన్న ఫోటోని ఎడిటింగ్ చేసి, దానికి బ్యాక్ గ్రౌండ్ సంగీతం జోడించి రూపొందించిన ఈ వీడియోపై పోలీస్ స్టేషన్ లో ఫిర్యాదు కూడా చేయాలనిపించిందని, అయితే మనం ఈ ఫిర్యాదుతో ఎంతమందిని నియత్రించగలం అనే ప్రశ్నతో ఆగిపోయానని ఆవేదన వ్యక్తం చేసింది.
ఆ యూ ట్యూబ్ వీడియో తనను బాగా ఇబ్బంది పెట్టిందని, వ్యక్తిగతంగా తనను టార్గెట్ చేయడమే కాకుండా తన పిల్లలను కూడా సీన్ లోకి లాగడం తనకు కోపాన్ని తెప్పించిందని సునీత వాపోయింది. ఇక టాలీవుడ్ టాప్ గాయకురాలిగా ‘బాహుబలి’ సినిమాలో ఎందుకు పాడలేదు? అన్న ప్రశ్నకు దర్శకుడు రాజమౌళి, సంగీత దర్శకుడు కీరవాణిలు ఫ్రెష్ వాయిస్ తో పాడించాలని నిర్ణయం తీసుకుని ఉండొచ్చు, అందుకే తనకు అవకాశం దక్కలేదేమో అంటూ సమాధానం ఇచ్చుకుంది.
