మెగాస్టార్ చిరంజీవి ఆచార్య తరువాత చెయ్యబోయే చిత్రం.. మలయాళీ బ్లాక్ బస్టర్ లుసిఫర్ యొక్క రీమేక్. ఇందుకోసం తమిళంలో రీమేక్ స్పెషలిస్ట్ గా పేరుపొందిన మోహన్ రాజా ని తెలుగులోకి తీసుకుని వచ్చారు చిరంజీవి. ఆ చిత్రానికి సంబంధించిన కాస్టింగ్ పని జరుగుతుందని సమాచారం.
ఈ చిత్రంలోని ఒక కీలక పాత్ర కోసం సత్యదేవ్ ని తీసుకున్నట్టు చెబుతున్నారు. ఇటీవలే కాలంలో సత్యదేవ్ మంచి నటన, ప్రతిభతో ప్రేక్షకులను బాగా ఆకట్టుకున్నాడు. కాబట్టి అతనిని ఇంటికి పిలిచి అభినందించి.. చిరంజీవి ఈ రోల్ ఆఫర్ చేసినట్టు సమాచారం. అయితే ఆ పాత్ర ఏది అనే దాని మీద ఇంకా స్పష్టత లేదు.
సీనియర్ నిర్మాత ఎన్వీ ప్రసాద్, రామ్ చరణ్ తన కొణిదెల ప్రొడక్షన్ కంపెనీ బ్యానర్‌లో ఈ చిత్రాన్ని కలిసి నిర్మించనున్నారు. చిరంజీవి ప్రస్తుతం ఆచార్య సినిమా షూటింగ్ బిజీ లో ఉన్నారు. ఆ సినిమా తరువాత ఈ సినిమా సెట్స్ మీదకు వెళ్తుంది. ఏప్రిల్ లో మొదలవచ్చు అని అంచనా.
ఈ ఏడాది లాక్ డౌన్ లో నెట్ ఫ్లిక్స్ లో విడుదలైన ఉమామహేశ్వర ఉగ్రరూపస్య సక్సెస్ తో సత్యదేవ్ మంచి ఊపు మీద ఉన్నాడు. ప్రస్తుతం అతనికి సంబంధించిన రెండు చిత్రాలు – తిమ్మరుసు, గుర్తుందా శీతాకాలం సెట్స్ మీద ఉన్నాయి. ఇటువంటి తరుణంలో చిరంజీవి సినిమా చేసే అవకాశం అంటే విశేషం అనే చెప్పుకోవాలి.
