మరో మూడు రోజుల్లో మూడు సినిమాలు ఒకే రోజు విడుదల కానుండడంతో టాలీవుడ్ లో పండగ వాతావరణం నెలకొంది. సాధారణంగా పెద్ద హీరోల సినిమాలు విడుదలయ్యే సమయంలో మాత్రమే ఈ స్థాయి ప్రచారం, హంగామా కనపడుతుంటుంది. కానీ అందుకు విరుద్ధంగా ఈ మూడు సినిమాల గురించి ట్రేడ్ వర్గాలతో పాటు సినీ ప్రేక్షకులలో కూడా చర్చలు జరుగుతున్నాయి. విశేషం ఏమిటంటే… మూడు సినిమాలు కూడా డిఫరెంట్ జోనర్స్ కాగా, వేటికవే ప్రేక్షకులలో భారీ అంచనాలను ఏర్పాటు చేసుకోవడంలో సక్సెస్ సాధించాయి.
దీంతో ఓ బొమ్మ బాక్సాఫీస్ వద్ద భారీ హిట్ కొడుతుందోనని ఆసక్తిగా అందరూ ఎదురుచూస్తున్నారు. తన సినిమాలతో పాటు విడుదల కాబోతున్న నితిన్, రకుల్ ప్రీత్ సింగ్ సినిమాలు కూడా విజయవంతం కావాలని, అంతిమంగా ‘సినిమా’ గెలవాలని రానా చేసిన ట్వీట్ కు రకుల్ మరియు నితిన్ లు స్పందించారు. రానాకు థాంక్స్ చెప్పిన రకుల్, “నీకు కూడా ఆల్ ది బెస్ట్, నాకు తెలుసు ఇది గేమ్ చేంజర్” అంటూ రిప్లై ఇచ్చింది. మరికాసేపటికి నితిన్ కూడా “రానాకు థాంక్స్ చెప్తూ… మనందరి సినిమాలు విజయవంతం కావాలని” ట్వీట్ చేసారు.
ఈ ముగ్గురి సెలబ్రిటీల మధ్య జరిగిన ఈ సరదా ట్వీట్ల సందేశం సోషల్ మీడియాలో వైరల్ అయ్యింది. బాక్సాఫీస్ వద్ద పోటీపడబోతున్న ఈ ముగ్గురు ఆహ్లాదకరమైన అనుభూతులను పంచుకోవడం అనేది సినీ ప్రేక్షకులలో పాజిటివ్ సంకేతాలను పంపించినట్లయ్యింది. రానా అన్నట్లు… ఈ మూడు సినిమాలు హిట్టయితే, తెలుగు సినిమా ఇండస్ట్రీకి పండగే కదా! సంక్రాంతి సందర్భంగా విడుదలైన సినిమాలు మూడు హిట్ కావడంతో, అదే సీన్ రిపీట్ అవుతుందని ట్రేడ్ వర్గాలు అంచనా వేస్తున్నాయి.
