మార్చి 11వ తేదీన విడుదలకు నోచుకున్న రెబల్ స్టార్ ప్రభాస్ “రాధే శ్యామ్” చిత్ర యూనిట్ ఎలాంటి ప్రమోషన్స్ చేయకపోవడంతో, ఇటీవల అభిమానులు ట్విట్టర్ లో బాయ్ కాట్ యువీ క్రియేషన్స్ అంటూ ఓ ట్రెండ్ కూడా చేసారు. అంతలా ఫ్యాన్స్ సహనాన్ని పరీక్షించిన చిత్ర యూనిట్ ఎట్టకేలకు తమ తదుపరి ప్రమోషన్స్ తేదీని ప్రకటించింది.
“రాధే శ్యామ్”లో సూపర్ హిట్ గా నిలిచిన “ఈ రాతలే” వీడియో సాంగ్ ప్రోమోను గురువారం నాడు మధ్యాహ్నం 2 గంటలకు విడుదల చేయబోతున్నట్లుగా ప్రకటించారు. అంతేకాదు ఈ పాట పూర్తి వీడియో సాంగ్ ను కూడా విడుదల చేయబోతున్నారు. “భీమ్లా నాయక్” విడుదల తేదీ అయిన 25వ తేదీన ఫుల్ సాంగ్ రిలీజ్ చేస్తున్నట్లు ఓ పోస్టర్ ద్వారా ప్రకటించారు.
ఎట్టకేలకు “రాధే శ్యామ్” నుండి అప్ డేట్ రావడంతో, ప్రభాస్ అభిమానులు ఊపిరి పీల్చుకున్నారు. అంతేగాక సూపర్ హిట్ గా నిలిచిన వీడియో సాంగ్ వస్తుండడంతో, అంచనాలు పెంచుతుందని ఆశిస్తున్నారు. ఈ పాటను మొత్తం 5 భాషల్లో కూడా విడుదల చేయబోతున్నారు. బుడ్డి పాపకు బెలూన్ ఇస్తూ నిల్చున్న స్టిల్ అభిమానులను ఆకట్టుకుంటోంది.
‘జిల్’ ఫేమ్ రాధాకృష్ణ దర్శకత్వం వహిస్తోన్న ఈ సినిమా మొత్తం అయిదు భాషల్లో ప్రపంచ వ్యాప్తంగా మార్చ్ 11వ తేదీన విడుదల కానుంది. జ్యోతిష్యానికి – డెస్టినీని ముడిపెడుతూ కట్ చేసిన ట్రైలర్ సినిమాపై అంచనాలను అమాంతం పెంచింది. ముఖ్యంగా సినిమాలోని ప్రతి షాట్ కూడా ‘విజువల్ వండర్’ అన్న అనుభూతిని ప్రేక్షకులకు పంచింది.
