బాలీవుడ్ లో కంగనాకు స్టార్ డంతో పాటు ఎన్నో అవార్డులు తెచ్చిపెట్టిన సినిమా “క్వీన్.” నటనకు ప్రాధాన్యం ఉన్న పాత్రలు హీరోయిన్లకు చాలా అరుదుగా లభిస్తుంటుంది. అలాంటి పాత్రే “క్వీన్” సినిమాలో కంగనా పోషించి విమర్శకుల ప్రశంసలు పొందింది. దీంతో ఈ సినిమాను దక్షిణాదిన రీమేక్ చేయడానికి అనేక మంది అగ్ర కధానాయకుల పేర్లు వచ్చి, మరుగున పడిన విషయం తెలిసిందే.
అయితే మళ్ళీ చాలాకాలం తర్వాత “క్వీన్” సినిమా రీమేక్ వార్తలు ప్రచారంలోకి వచ్చాయి. ఈ సారి తెరపైకి వచ్చిన మహారాణి “ప్రేమమ్” సినిమా హీరోయిన్ పార్వతి. సినీ విమర్శకుల ప్రశంసలతో పాటు యువతరం మనసు దోచుకున్న యువ కధానాయక పార్వతి ఈ ‘క్వీన్’ సినిమా రీమేక్ కు ఓకే చెప్పినట్లుగా మీడియాలో వర్గాల్లో కధనాలు ప్రసారమవుతున్నాయి.
‘క్వీన్’ సినిమా రీమేక్ లో కంగనా పాత్ర కోసం అందం, అభినయం కలగలిసిన పార్వతిని ఎంపిక చేయగా, ఒకప్పటి అందాల రాణి అయిన సుహాసిని తెలుగు, తమిళ భాషల్లో ఈ సినిమా దర్శకత్వ బాధ్యతలను చేపట్టనున్నారని.., అలాగే, నటనలో రాణి అయిన రేవతి ఈ సినిమా కోసం ‘కలం’ కదపనున్నారని… తెలుస్తోంది. ఇలా ఈ ముగ్గురు మహారాణులు “క్వీన్” సౌత్ రీమేక్ కోసం ఒక్కటయ్యారన్న మాట.