యంగ్ రెబెల్ స్టార్ ప్రభాస్ తదుపరి చిత్రం రాధే శ్యామ్. ఈ చిత్రం యొక్క ఫస్ట్ లుక్ పోస్టర్ ఇటీవల విడుదలైంది. ఈ చిత్రం ఈ సంవత్సరం దసరా స్పెషల్ గా విడుదల కావాల్సి ఉంది, కానీ కరోనావైరస్ వల్ల వచ్చిన విరామం కారణంగా, వచ్చే ఏడాదికి వాయిదా పడింది. రిలీజ్ ఎప్పుడు అనేది షూటింగ్ మొదలైతే గానీ స్పష్టత రాదు.
ఈ చిత్ర దర్శకుడు రాధాకృష్ణ ఒక ఇంటర్వ్యూలో మాట్లాడుతూ ఈ చిత్రం గురించి కొన్ని ఆసక్తికరమైన వ్యాఖ్యలు చేశారు. “రాధే శ్యామ్ ప్రభాస్ చేస్తున్న మొట్టమొదటి ఇంటెన్స్ ప్రేమకథ. యాక్షన్ హీరో నుండి లవర్ బాయ్ గా అతని పరివర్తన ప్రేక్షకులను మంత్రముగ్దులను చేస్తుంది” అని ఆయన అన్నారు.
రాధే శ్యామ్ 1960ల సమయంలో ఐరోపాలో జరిగిన ఒక కథని ఆధారంగా తీస్తున్న చిత్రం. ఈ చిత్రం యొక్క కొంత భాగాన్ని ఐరోపాలో షూట్ చేసినప్పటికీ, హైదరాబాద్‌లో నిర్మించిన భారీ సెట్లలో ఎక్కువ భాగం షూటింగ్ జరుగుతుంది, ఇవి 60 వ దశకంలో ఐరోపాను పోలి ఉంటుంది.
కరోనా ముప్పు ఉన్నందున, సినీ బృందం విదేశాల షూట్లకు వెళ్ళడానికి ఆసక్తి చూపడం లేదు. ప్రభాస్ తాజా చిత్రాల మాదిరిగా ఈ సినిమాకు దేశవ్యాప్తంగా ఒకే సారి విడుదల అవుతుంది. ఈ చిత్రానికి మ్యూజిక్ డైరెక్టర్ ఎవరు అనేది ఇంకా కంఫర్మ్ కాలేదు. సాహూ మాదిరిగా అనేక మంది మ్యూజిక్ డైరెక్టర్లు పని చేసే అవకాశం ఉన్నట్టు సమాచారం.
