ఎస్.జే.సూర్య వెళ్ళిపోయిన తర్వాత, పవర్ స్టార్ పవన్ కళ్యాణ్ సినిమాకు దర్శకత్వ బాధ్యతలు చేపట్టిన ‘గోపాల గోపాల’ ఫేం డాలీ, స్క్రిప్ట్ కు తుది రూపం తీసుకువచ్చే పనిలో ఉన్నారని తెలుస్తోంది. అలాగే ముందుగా భావించినట్లు ఈ సినిమా టైటిల్ ‘కడప కింగ్’ కాకుండా ‘కాటంరాయుడు’గా పవర్ స్టార్ కనపడనున్నారని కొత్త టైటిల్ తెరపైకి వచ్చింది. ‘అత్తారింటికి దారేది’లో పవన్ కళ్యాణ్ ఆలపించిన సూపర్ హిట్ సాంగ్ ‘కాటమరాయుడా…’ అనే పదంతోనే ప్రారంభమైన నేపధ్యంలో… ఈ ‘కాటంరాయుడు’ టైటిల్ అభిమానులను ఆకట్టుకుంటోంది.
సెప్టెంబర్ మొదటి వారం నుండి ఈ సినిమా షూటింగ్ మొదలు కానుందని ప్రచారం జరిగినప్పటికీ, మారిన రాజకీయ పరిస్థితుల నేపధ్యంలో… పవన్ సెప్టెంబర్ 9వ తేదీన కాకినాడలో మీటింగ్ పెడుతుండడంతో, బహుశా సెకండ్ వీక్ లో సెట్స్ పైకి వెళ్తుందేమోనన్న భావన వ్యక్తమవుతోంది. అయితే ఈ కధను కేవలం 50 రోజుల షూటింగ్ లో పూర్తి చేయాలని దర్శకుడు డాలీకి పవర్ స్టార్ సూచనలు చేసినట్లుగా తెలుస్తోంది. సూర్య సినిమా ఆగిపోయిన తర్వాత ప్రకటించిన ఈ ప్రాజెక్ట్ కూడా ఆగిపోయిందన్న వార్తలతో కలత చెందిన పవర్ స్టార్ అభిమానులకు, ఈ ‘కాటంరాయుడు’ సిద్ధమవుతుండడం సంతోషం కలిగించే విషయమే.
