సూపర్ స్టార్ కృష్ణను తమ జన్మలో మరువలేమని, సినీ రంగంలో తమకు చేయూత నిచ్చిన మహానుభావుడని ప్రముఖ మాటల రచయిత పరుచూరి గోపాలకృష్ణ అన్నారు. ‘పరుచూరి పలుకులు’లో నటశేఖర కృష్ణతో తమకు ఉన్న అనుబంధాన్ని, తమను ఆయన ప్రోత్సహించిన విషయాన్ని ఈ సందర్భంగా గోపాలకృష్ణ చెప్పుకొచ్చారు.
‘1980లలో కృష్ణ గారు నటించిన ‘పగబట్టిన సింహం’, ‘బంగారుభూమి’ చిత్రాలకు ఘోస్ట్ రైటర్ గా పనిచేశా. ‘బంగారుభూమి’లో కృష్ణ, శ్రీదేవి నటించిన ఓ సన్నివేశానికి నేను డైలాగ్ రాశాను. ‘పద్మా…. మనిషిని నమ్మితే మన నోట్లో ఇంత మట్టి కొడతాడు. అదే, మట్టిని నమ్మితే మన నోటికి ఇంత ముద్ద పెడుతుంది. ఆ మట్టికి నమస్కారం చేసి కొబ్బరికాయ కొట్టు’ అనేది ఆ డైలాగ్. షూటింగ్ స్పాట్ లో సీన్ ఇవ్వగానే చూసిన కృష్ణగారు ఈ డైలాగ్ ఎవరు రాశారని ప్రశ్నిస్తే, చిత్ర యూనిట్ చెప్పలేదట.
ఈ డైలాగ్ ఎవరు రాశారో చెప్పమని కృష్ణ గారు మళ్లీ అడగడంతో ‘ఉయ్యూరు లెక్చరర్’ అని వారు చెప్పారని’ గోపాలృష్ణ అన్నారు. ‘ఇతను చాలా లోతుగా వెళ్లి ఆలోచించాడని’ మెచ్చుకున్నారట. ఆ తర్వాత ఎనిమిది సినిమాలకు మాటలు రాసే అవకాశాన్ని ఆ మహానుభావుడు మాకు కల్పించాడు. అన్న ఎన్టీఆర్ గారు మాకు పరుచూరి బ్రదర్స్ అని పేరుపెట్టి ఆశీర్వదిస్తే, మాకు చేయూత నిచ్చి ఆశీర్వదించింది కృష్ణ గారు. ఆయన్ని ఈ జన్మలో మర్చిపోలేం’ అని గోపాలకృష్ణ అన్నారు.
ఇక ‘ఈనాడు’ సినిమా విషయాన్ని ప్రస్తావిస్తూ… ఈ సినిమాను రిలీజ్ రోజునే విజయవాడలో కృష్ణ గారితో కలసి చూశాం. ప్రేక్షకులకు అద్భుతంగా నచ్చింది. ఆ తర్వాత అక్కడి నుంచి గుంటూరు వెళ్లాం. ‘ఈ సినిమాకు డైలాగ్స్ రాసింది వీళ్లే’ అంటూ కృష్ణ గారి సోదరుడు ఆదిశేషగిరిరావు మమ్మల్ని పరిచయం చేశారు. అంతే, ఈ సినిమాలో డైలాగ్స్ బాగున్నాయనే ఆనందంతో అక్కడున్న కృష్ణ ఫ్యాన్స్ నా బుగ్గలు కూడా కొరికేశారు. ఆ సంగతి నేను మర్చిపోలేను.
వాళ్లకు దండం పెట్టి ‘ఆగండయ్యా బాబు’ అనాల్సి వచ్చింది. ఈ సినిమాలో హీరోయిన్, డ్యూయెట్స్ లేకపోవడంతో ఎలా ఉంటుందోనని అభిమానులు వణికిపోయారు. కానీ, ఈ సినిమా నాడు చరిత్ర సృష్టించింది.. రికార్డులన్నీ తిరగరాసింది. ఎన్టీఆర్ గారు తర్వాత అంతగా మేము గౌరవించే వ్యక్తి కృష్ణ గారు’ అంటూ పరుచూరి గోపాలకృష్ణ పాత జ్ఞాపకాలను నెమరువేసుకున్నారు.
