యువ హీరో నిఖిల్ నటిస్తున్న తాజా చిత్రం ముద్ర. ఈ సినిమా ప్రస్తుతానికి నిర్మాణ దశలో ఉంది. అయితే సీనియర్ నిర్మాత నట్టి కుమార్ జగపతి బాబు హీరోగా మరో సినిమా అదే టైటిల్ తో ఇటీవలే విడుదల చెయ్యడంతో ఈ విషయం కాస్తా వివాదాస్పమైంది. ఈ నేపథ్యంలో సినిమా టైటిల్ను ‘అర్జున్ సురవరం’గా మారుస్తూ కొత్త పోస్టర్ను చిత్ర బృందం తాజాగా విడుదల చేసింది. ఈ సినిమాలో నిఖిల్ అర్జున్ లెనిన్ సురవరం అనే జర్నలిస్ట్ పాత్రలో నటించారు. చిత్ర షూటింగు దాదాపుగా పూర్తి అయ్యింది.
వ్యాను నుంచి నిఖిల్ కెమెరాతో ఓ దృశ్యాన్ని చిత్రీకరిస్తూ ఫస్ట్లుక్లో కన్పించారు. ఇందులో నిఖిల్కు జోడీగా లావణ్య త్రిపాఠి నటిస్తున్నారు. సంతోష్ ఈ చిత్రానికి దర్శకత్వం వహిస్తున్నారు. ఈ సినిమా తొలుత డిసెంబరు లో విడుదల చెయ్యాలి అనుకున్నా వీఎఫ్ఎక్స్ ఎఫెక్ట్స్ను జోడించే నేపథ్యంలో ఆలస్యం కావడంతో సినిమా విడుదలను వాయిదా వేశారు. తాజాగా మార్చి 29న ప్రపంచవ్యాప్తంగా ఈ చిత్రం ప్రేక్షకుల ముందుకు రాబోతోందని నిర్మాతలు ప్రకటించారు.
ఔరా సినిమాస్, మూవీ డైనమిక్స్ సంస్థలు సంయుక్తంగా నిర్మిస్తున్నాయి. ‘ఠాగూర్’ మధు సమర్పిస్తున్నారు. గత కొద్ది కాలంగా వరుస పరాజయాలతో సతమతం అవుతున్నాడు నిఖిల్. ఈ చిత్రంతో అయినా విజయాల బాట పట్టాలని ఆయన పట్టుదలగా ఉన్నాడు. అర్జున్ సురవరం తమిళ్ లో వచ్చిన కణ్ణితన్ అనే చిత్రం రీమేక్. నిఖిల్ గత చిత్రం కిరాక్ పార్టీ కూడా రీమేక్ చిత్రం కావడం విశేషం. మర్చిలో విడుదలయ్యే ఈ సినిమా నిఖిల్ కు ఎలాంటి ఫలితాన్ని ఇస్తుందో చూడాలి.