భారీ అంచనాలు పెంచితే… తర్వాత ప్రేక్షకుల రియాక్షన్స్ ‘పాజిటివ్’ కంటే ‘నెగటివ్’కే ఎక్కువ ఆస్కారం అన్న సత్యాన్ని బోలెడు సినిమాలు నిరూపించాయి. నిజానికి ఒక్క సినిమా విషయంలోనే కాదు, ఎందులోనైనా భారీ అంచనాలు ప్రతికూల ఫలితాలకే దారి తీస్తాయి. ప్రస్తుతం ఈ జాబితాలో చేరింది… నాని నటించిన “నిన్ను కోరి” సినిమాలోని ‘అడిగా అడిగా…’ అన్న మెలోడీ గీతం.
ఓ సెల్ఫీ వీడియోతో స్వీట్ సర్ ప్రైజ్ రాబోతోంది అంటూ ప్రచారం చేసిన నాని, ఆ తర్వాత విడుదల చేసిన చిన్న టీజర్ తో శ్రోతలతో పాజిటివ్ వైబ్ ను కలిగించాడు. అయితే అసలు సినిమా ముందుంది అంటూ… ఊరిస్తూ వచ్చిన నాని, ఎట్టకేలకు ఆ పాటను పూర్తిగా విడుదల చేసారు. లిరికల్ వీడియోలా కాకుండా నాని పాడుతున్న ప్రమోషనల్ సాంగ్ గా విడుదల చేసిన ఈ పాటకు ‘అంత సీన్ లేదంటూ’ సంగీత ప్రియులు తేల్చేసారు.
గోపి సుందర్ సంగీతం అందించిన ఈ పాటను సిడ్ శ్రీరామ్ ఆలపించారు. అసలు పాట ఓపెనింగ్ లోనే శ్రీరాం స్వరం నానికి ఏ మాత్రం సెట్ కాకపోవడంతో, ఇక వినాలన్న ఆసక్తి నెమ్మదిగా సన్నగిల్లుతుంది. సాహిత్య పరంగా శ్రిజో కొంతవరకు సంతృప్తి పరిచినప్పటికీ, గోపి సుందర్ సంగీతం మరియు శ్రీరామ్ స్వరం కలగలిపి ఈ పాటను ప్రేక్షకులకు చేరువ చేయడం కష్టమేనని చెప్పవచ్చు.
బహుశా ఎలాంటి ఓవర్ పబ్లిసిటీ లేకుండా రిలీజ్ చేసి ఉంటే, మరీ ఇంత నెగటివ్ అభిప్రాయం కలిగేది కాదేమో గానీ, నాని ఇచ్చిన హైప్ తో ఈ పాటను ఎవరూ అడగాల్సిన అవసరం లేకుండా పోయింది. బహుశా సినిమాలో అయినా గాయకుడ్ని మారిస్తే ఎంతోకొంత ప్రేక్షకులకు చేరువయ్యే అవకాశం ఉంటుంది గానీ లేదంటే రియాక్షన్స్ దారుణంగా ఉండే అవకాశము లేకపోలేదు. ఈ పాటకు వచ్చిన స్పందన తర్వాత “హైప్” విలువ ఏమిటో నానికి తెలిసి వచ్చుంటుందని చెప్పడంలో సందేహం లేదు.
