MLC Anantha Babu case so many questionsవైసీపీ ఎమ్మెల్సీ అనంత బాబు డ్రైవర్ సుబ్రహ్మణ్యాన్ని హత్య చేసి 20 రోజులైంది. కానీ ఇంతవరకు పోలీసుల దర్యాప్తు పూర్తి కాలేదు. అతనితో పాటు ఇంకెంతమంది ఈ హత్యలో పాల్గొన్నారో తేల్చనేలేదు. ఎవరినీ అరెస్ట్ చేయలేదు. పైగా ఏదో విదంగా అనంతబాబుని ఈ కేసు నుంచి బయటపడేసేందుకు పోలీసులే ఈ కేసును నీరుగార్చేందుకు ప్రయత్నిస్తున్నారని రాష్ట్ర పౌరహక్కుల సంఘం అధ్యక్షుడు సుబ్బారావు ఆరోపించారు.

ఆయన ఈరోజు రాజమండ్రి ప్రెస్‌క్లబ్బులో మీడియాతో మాట్లాడుతూ పోలీసులకు పలు ప్రశ్నలు సందించారు. అవన్నీ యదాతదంగా చెప్పుకోవాలంటే ఓ పుస్తకమే ప్రచురించాల్సి ఉంటుంది. కనుక క్లుప్తంగా ఆయన అడిగిన ప్రశ్నలు ఏమిటో తెలుసుకొందాం.

· అనంతబాబు ఒక్కడే ఈ హత్య చేశాడంటారు. కానీ ఎఫ్ఐఆర్‌లో అనంతబాబుతో పాటు మరికొందరు ఉన్నారని పేర్కొన్నారు. సుబ్రహ్మణ్యం హత్య కేసులో మొత్తం ఎంత మంది పాల్గొన్నారు? వారి వివరాలు పోలీసులు ఎందుకు బయటపెట్టడం లేదు. అసలు ఇంతవరకు వారిని ఎందుకు అరెస్ట్ చేయలేదు?

· డ్రైవర్ సుబ్రహ్మణ్యం ఒంటిపై 31 గాయాలు, అంతర్గతంగా మూడు తీవ్ర గాయాలు ఉన్నట్లు పోస్టుమార్టం నివేదికలో తెలిపారు. అనంతబాబు ఒక్కడే ఇన్ని గాయాలు చేయగలడా?ఒకవేళ గాయపరిచి ఉంటే ఆయన ఒక్కడే అతని మృతదేహాన్ని మోసుకొని తీసుకురాగలరా?

· పోలీసులు కోర్టుకు సమర్పించిన అరెస్టు మెమోలో అనంతబాబుకి గతంలో ఎటువంటి నేర చరిత్ర లేదని పేర్కొన్నారు. కానీ 2014లో అనంతబాబుపై అడ్డతీగల పోలీస్‌స్టేషన్‌లో రౌడీ షీట్ ఉంది కదా? దానిని అరెస్టు మెమోలో ఎందుకు పేర్కొనలేదు?

· అనంతబాబుపై పోలీస్‌స్టేషన్‌లో రౌడీ షీట్ ఉన్నప్పుడు వైసీపీ ఆయనకు ఎమ్మెల్సీ పదవి ఎందుకు ఇచ్చింది?చట్టసభలలో ఇలాంటివారున్నప్పుడు ఇక డ్రైవర్ సుబ్రహ్మణ్యం వంటి సామాన్యుల మానవహక్కులు ఏవిదంగా కాపాడగలరు?

· సెక్షన్ 164 ప్రకారం ఇంతవరకు మేజిస్ట్రేట్ ముందు సాక్షుల వాంగ్మూలం ఎందుకు నమోదు చేయలేదు?