ఎప్పుడు ఆనందంగా ఉండడమే తన గ్లామర్ రహస్యంగా మహేష్ బాబు చాలా సందర్భాలలో చెప్పారు. మహేష్ స్మైల్ కు అభిమానులు అంతలా ఫిదా అయిపోతారు, ఇక లేడీ ఫ్యాన్స్ విషయమైతే చెప్పనవసరమే లేదు. అంతలా సూపర్ స్టార్ తన స్మైలింగ్ ఫేస్ తో అందరిని కట్టి పడేస్తారు.
కానీ ఇపుడు ఆ చిరునవ్వే మహేష్ ముఖంలో మిస్ అయ్యింది. సూపర్ స్టార్ మేనల్లుడు గల్లా అశోక్ వెండితెరకు పరిచయం అవుతోన్న సినిమా “హీరో” సంక్రాంతి సందర్భంగా శనివారం నాడు విడుదల అవుతోన్న నేపధ్యంలో శుభాకాంక్షలు తెలుపుతూ ఓ వీడియోను రిలీజ్ చేసారు మహేష్ బాబు.
కరోనా నుండి కోలుకున్న తర్వాత అభిమానులకు మహేష్ కనిపించడం ఇదే తొలిసారి. అలాగే తన సోదరుడు రమేష్ బాబు అకాల మరణం నుండి కోలుకున్న మహేష్ ఎలా ఉన్నాడోనని ఆశించిన అభిమానులకు, సూపర్ స్టార్ ముఖచిత్రం ఫ్యాన్స్ ఆవేదనకు కారణమవుతోంది.
“హీరో” సినిమా గురించి, అశోక్ పడ్డ కష్టం గురించి, సంక్రాంతి పండగ తమ ఫ్యామిలీకి కలిసి వచ్చే తీరు గురించి చెప్పుకొచ్చారు గానీ, ఎక్కడా ముఖంలో ఇసుమంత సంతోషం గానీ, ఎప్పుడూ సహజంగా కనిపించే ఆ చిరునవ్వు గానీ మహేష్ లో మచ్చుకైనా కనిపించలేదు.
గల్లా జయదేవ్ అంటే ప్రత్యేకమైన అభిమానం కలిగిన మహేష్, మేనల్లుడు సినిమా ‘హీరో’ రిలీజ్ అవుతుంటే శుభాకాంక్షలు తెలపడానికి వీడియో బైట్ ఇచ్చారు గానీ, రమేష్ బాబు ఉదంతం నుండి కోలుకోలేదని ఈ వీడియో స్పష్టం చేస్తోంది. మళ్ళీ ఎన్నాళ్ళకి మహేష్ లో ఆ చిరునవ్వును చూస్తామో అనుకోవడం అభిమానుల వంతవుతోంది.
