‘అతిలోకసుందరి’ శ్రీదేవి హఠాన్మరణంతో తనను మళ్లీ వెండితెరపై చూడాలనుకున్న అభిమానులకు తీవ్ర నిరాశే మిగిలింది. ఒకవేళ ఆమె బతికి ఉండుంటే… బాలీవుడ్ నిర్మాత కరణ్ జోహార్ ప్రతిష్టాత్మకంగా తెరకెక్కించనున్న ‘షిద్ధత్’ చిత్రంలో అతిలోకసుందరి కూడా భాగస్వామి అయ్యేది. కానీ విధి ఆమెను తీసుకెళ్లిపోయింది.
ఈ సినిమా ఒకటి రెండు నెలల్లో సెట్స్‌పైకి వెళ్లనుందని సమాచారం. శ్రీదేవి మరణానంతరం కరణ్ ఈ ప్రాజెక్టును రద్దు చేసుకోవాలని కూడా నిర్ణయించుకున్నట్లు బాలీవుడ్ ఫిలిం సర్కిళ్లలో కొన్ని రోజుల కిందట పలు వార్తలు షికార్లు చేశాయి. కానీ లేటెస్ట్ న్యూస్ ప్రకారం, శ్రీదేవి పాత్రలో అలనాటి అందాల నటి మాధురీ దీక్షిత్ నటించనుందని తెలుస్తోంది.
ఈ ‘ఆజ్ నాచ్‌లే’ కధానాయిక కరణ్ జోహార్ కు మంచి ఫ్రెండ్ కూడా కావడంతో ఇందులో నటించేందుకు మాధురి గ్రీన్ సిగ్నల్ ఇస్తుందనేది ఓ టాక్. శ్రీదేవి పాత్రలో నటించడమే ఆమెకు నివాళి తెలిపేందుకు సరైన మార్గమని మాధురీ భావిస్తున్నట్లు సమాచారం. ఈ సినిమాలో వరుణ్ థావన్, ఆలియా భట్, సోనాక్షి సిన్హ, సంజయ్ దత్, ఆదిత్యారాయ్ కపూర్ లాంటి స్టార్ నటులు నటించనున్నారు. ‘2 స్టేట్స్’ చిత్ర దర్శకుడు అభిషేక్ వర్మన్ ఈ చిత్రానికి డైరెక్టర్.
