తెలుగు దేశం పార్టీ కారణంగా… అలాగే 2009లో ఆ పార్టీకి చేసిన ప్రచారం కారణంగా ఎన్టీఆర్ ని రాజకీయాలను వేరు చేసి చూడటం అనేది కుదరదు. అయితే రాజకీయరంగేట్రం గురించి అడిగినప్పుడల్లా… ప్రస్తుతానికి తన దృష్టాంతా సినిమాల పైనే అంటూ ఎన్టీఆర్ దానిని దాటవేస్తూ ఉంటాడు. చాలా సంవత్సరాలుగా, ఎన్టీఆర్ యొక్క పూర్తి స్థాయి రాజకీయ ప్రవేశం గురించి బలమైన ఊహాగానాలు ఉన్నాయి.
అయితే ఎన్టీఆర్ తన రాజకీయ ఆశయం గురించి బలమైన సందేశం ఇవ్వనున్నాడా? అంటే అవును అనే వినిపిస్తుంది ఫిల్మ్ నగర్ లో. మాస్ సెన్సేషన్ ప్రశాంత్ నీల్ ప్రస్తుతం తన కెజిఎఫ్ 2 విడుదల కోసం ఎదురు చూస్తున్నాడు. అతను ఇప్పటికే తన తదుపరి, చిత్రం సలార్ (ప్రభాస్‌తో) షూటింగ్ ప్రారంభించాడు.
ఆ తర్వాత ఎన్టీఆర్ కలిసి #NTR31 చిత్రం చేయనున్నారు. ఆ చిత్రం ప్రకటన ఇటీవల ఎన్టీఆర్ పుట్టినరోజున జరిగింది. ఈ చిత్రంలో తారక్ బలమైన, శక్తివంతమైన రాజకీయ నాయకుడిగా కనిపిస్తారని వార్తలు వస్తున్నాయి. కేవలం సినిమా పరంగానే కాకుండా నిజజీవిత రాజకీయాల గురించి కూడా ఇందులో కొన్ని హింట్లు ఇచ్చే అవకాశం ఉందని అంటున్నారు.
ఈ చిత్రం 2022 రెండవ భాగంలో అంతస్తుల్లోకి వెళ్లి 2023 లో విడుదల అవుతుంది. ఆర్ఆర్ఆర్ తరువాత #NTR31 కంటే ముందు ఎన్టీఆర్ కొరటాల తో ఒక సినిమా చెయ్యనున్నారు. ఆ సినిమా ఆగష్టు,సెప్టెంబర్ లలో సెట్స్ మీదకు వెళ్లే అవకాశం ఉంది. అయితే అందుకు కరోనా పరిస్థితులు సహకరించి ఆర్ఆర్ఆర్, ఆచార్య సినిమాల షూటింగులు పూర్తి కావాలి.
