గత కొన్ని రోజుల నుండి, మెగాస్టార్ చిరంజీవి దర్శకుడు మోహన్ రాజాతో సంతోషంగా లేరని… అందుకని ఆయన తో తలపెట్టిన లూసిఫర్ సినిమా రీమేక్ ప్రాజెక్టును నిలిపివేయాలని నిర్ణయించుకున్నట్లు వార్తలు వచ్చాయి. అయితే తాజాగా ఈ చిత్రం ఇంకా కొనసాగుతోందని, ఈ చిత్రానికి ‘కింగ్‌మేకర్’ అనే టైటిల్ ను మేకర్స్ పరిశీలిస్తున్నారని తాజా నివేదికలు వస్తున్నాయి.
ఈ చిత్రానికి సంబంధించిన స్క్రిప్ట్, మ్యూజిక్ కోసం మోహన్ రాజా పనిచేస్తున్నారని సమాచారం. సంగీత స్వరకర్తగా తమన్ ఉన్న ఈ చిత్రానికి ఇప్పటికే రెండు పాటలు ఖరారు చేశారని కూడా అంటున్నారు. సాహో ఫేమ్ సుజీత్ సైన్ మరియు వివి వినాయక్ గతంలో ఈ స్క్రిప్ట్ మీద పనిచేసినప్పటికీ మెగాస్టార్‌ను సంతృప్తిపరచలేకపోయారు.
ఇకపోతే… సోషల్ మీడియాలో అకారణంగా మోకాలికి బోడిగుండుకి లింక్ పెట్టడం సాధారణమే. ఈ టైటిల్ కు సంబంధించిన వార్తలు రాగానే కొందరు 2009లో చిరంజీవి ప్రజారాజ్యం పార్టీ పెట్టారని… అప్పట్లో కింగ్ కాకపోతే కనీసం కింగ్ మేకర్ కావడం ఖాయమని చిరంజీవి తన క్లోజ్ సర్కిల్ తో అనేవారని… ఆ కల కనీసం ఇలా అయినా నెరవేరుతుందని గిట్టని వారు ఎద్దేవా చేస్తున్నారు.
ఆ విషయం పక్కన పెడితే… లూసిఫర్ రీమేక్ పై క్లారిటీ కోవిడ్ సెకండ్ వేవ్ ఉదృతి తగ్గి… ఆచార్య షూటింగ్ పూర్తయ్యి విడుదలైతే గానీ వచ్చేట్టు లేదు. ఈ సినిమా కాకుండా చిరంజీవి ఇప్పటికే మెహర్ రమేష్, బాబీ దర్శకత్వంలో మరో రెండు సినిమాలకు ఒకే చెప్పారు. ఇందులో ఏది ముందూ ఏది వెనకాల అనేది తేలాల్సి ఉంది.
