తెలుగుదేశం పార్టీ నేతలను అడ్డుకోవడం ద్వారా రగిలిన గుడివాడ కేసినో రాజకీయం దేశ వ్యాప్తంగా హాట్ టాపిక్ అయ్యింది. ఇందులో ఆసక్తికరమైన విషయం ఏమిటంటే… గుడివాడ ఉదంతంపై కేంద్ర ఆర్ధిక మంత్రిత్వ శాఖలోని డీఆర్ఐ (డిపార్ట్మెంట్ ఆఫ్ రెవిన్యూ ఇంటిలిజెన్స్) ఇప్పటికే ఓ నివేదిక తయారు చేసిందట.
ప్రముఖ ఏబీఎన్ ఛానల్ చేపట్టిన చర్చలో ఈ డీఆర్ఐ నివేదికలోని అంశాలను ప్రస్తావించారు. 5 రోజుల పాటు నిర్వహించిన కేసినోలో 8200 మందిని లోపలికి తరలించారట. మనిషికి ఎంట్రీ ఫీజు క్రింద 10 వేల రూపాయలు వసూలు చెసారట. హైదరాబాద్ నుండి విశాఖ వరకు అనేక ప్రాంతాల నుండి వీరిని ఈ కేసినో నిర్వాహకులే స్వయంగా వెహికల్స్ పెట్టి తరలించారట.
ఈ కేసినో బుకింగ్స్ కూడా నగదు రూపంలో కాకుండా, వాట్సాప్ గ్రూప్ ల ద్వారా జరిగినట్లుగా డీఆర్ఐకు అందిన సమాచారంగా చెప్పారు. ఎంట్రీ ఫీజు రూపంలో 8200 మందికి గానూ 10 వేల చొప్పున 82 కోట్లు సేకరించగా, 227 కోట్ల లావాదేవీలు కేసినోలో జరిగినట్లుగా డీఆర్ఐ (డిపార్ట్మెంట్ ఆఫ్ రెవిన్యూ ఇంటిలిజెన్స్) అంచనా వేసిందట.
ఈ వీడియోలో ‘సంక్రాంతి సంబరాలు’ అంటూ ఏపీ సీఎం జగన్ మోహన్ రెడ్డి మరియు గుడివాడ ఎమ్మెల్యే కొడాలి నానిలతో కూడిన ఫ్లెక్సీ బ్యానర్లు దర్శనమిస్తున్నాయి. అంటే వీరి ప్రమేయం లేకుండానే ఈ కేసినోను 5 రోజుల పాటు విజయవంతంగా నిర్వహించగలిగారా? ఏపీలో కొత్త సినిమాకు ఒక్క షో అధికంగా వేస్తేనే సాయంత్రానికి ధియేటర్లను సీజ్ చేసిన ఘనత ఏపీ సొంతం.
అలాంటిది తొలి రోజు నుండే ఎలక్ట్రానిక్ మరియు సోషల్ మీడియాలో తెగ వైరల్ అయిన ఈ కేసినో గురించి అయిదు రోజుల పాటు ఎవరికి తెలియదంటే నమ్మే స్థితిలో ప్రజలు ఉన్నారా? ఒకవేళ ఇదే నిజమైతే అంత అలసత్వం ఆంధ్రప్రదేశ్ ప్రభుత్వంలో ఉందా? ఇలాంటి అనేక ప్రశ్నలకు తావిచ్చేలా అధికార పక్షం తీరు ఉంటోంది.
