తన సినిమాలు వరుసగా విఫలం కావడంతో ఆచితూచి అడుగులు వేస్తున్న మెగా హీరో రామ్ చరణ్, తన తదుపరి సినిమాను క్రియేటివ్ దర్శకుడు సుకుమార్ తో చేస్తున్న విషయం తెలిసిందే. ఇప్పటికే స్క్రిప్ట్ వర్క్ పూర్తి కాగా, డిసెంబర్ నుండి ఈ సినిమా సెట్స్ పైకి వెళ్లనుంది. గ్రామీణ వాతావరణ నేపధ్యంలో సాగే ఏమోషనల్ కధగా గతంలో సుకుమార్ ఈ సినిమా గురించి ఓ ఆసక్తికరమైన సమాచారం ఇచ్చారు. అయితే ఈ సినిమాను నిర్ణయించిన టైటిల్ మాత్రం అందుకు పూర్తి విరుద్ధంగా, కొత్తదనానికి పరాకాష్టగా ఉండడం విశేషం.
“ఫేస్ బుక్ లైవ్ చాట్ ఎట్ 8.18 పిఎం” అనే పేరును ఈ సినిమా టైటిల్ గా ఖరారు చేయాలని సుకుమార్ భావిస్తున్నట్లుగా సినీ జనాలు చెప్పుకుంటున్నారు. అంతకుముందు “ఫార్ములా ఎక్స్” అని హల్చల్ చేసినప్పటికీ, ఆ టైటిల్ ను ఇప్పటికే చిత్ర యూనిట్ ఖండించడంతో క్లారిటీ వచ్చింది. కానీ తాజాగా వెలుగులోకి వచ్చిన టైటిల్ మాత్రం సరికొత్తగా ఉన్నా, మెగా అభిమానులు ఆహ్వానించే టైటిల్ లా మాత్రం కనపడడం లేదు. అందులోనూ గతంలో సుకుమార్ చెప్పిన గ్రామీణ వాతావరణానికి, ఈ టైటిల్ కు ఎక్కడా మ్యాచ్ కాకపోవడం గమనించదగ్గ విషయం.
మెగా సినిమాల టైటిల్స్ ఎప్పుడూ మాస్ వర్గాలకు రీచ్ అయ్యేలా నిర్ణయిస్తారు. ఇందులో ఏ మాత్రం కాంప్రమైజ్ కారన్న విషయాన్ని ఒక్కసారి ఫ్లాష్ బ్యాక్ లోకి వెళ్లి టైటిల్స్ ను పరిశీలిస్తే ఇట్టే అర్ధమవుతుంది. మరి ప్రస్తుతం హల్చల్ చేస్తోన్న టైటిలే ఫైనల్ అవుతుందో లేక మార్పులు వస్తాయో గానీ, ఈ టైటిల్ మాత్రం జీర్ణించుకోవడం కష్టమే అంటున్నారు మెగా ఫ్యాన్స్. అయితే ఇటీవల కాలంలో రామ్ చరణ్ లో కూడా మార్పు వచ్చిందని, మాస్ వర్గాలకే పరిమితం కాకుండా అన్ని వర్గాలకు చేరువయ్యే నిర్ణయాలు తీసుకుంటున్నారని సినీ జనాలు చెప్పుకుంటున్న విషయం తెలిసిందే.
