సూపర్ స్టార్ కృష్ణ ప్రధాన పాత్రలో ముప్పలనేని శివ దర్శకత్వం వహిస్తున్న “శ్రీ శ్రీ” సినిమాలో అతిథి పాత్ర చేయడానికి కృష్ణ అల్లుడు సుధీర్ బాబు సిద్ధమయ్యాడు. క్లైమాక్స్ లో కనిపించే ఓ పోలీస్ ఆఫీసర్ పాత్రను సుధీర్ బాబు చేస్తున్నారు. దీనికి సంబంధించిన షూటింగ్ నేడు జరుగుతోంది. సుధీర్ బాబుతో పాటు ఆయన తనయుడు మాస్టర్ దర్శన్ కూడా “శ్రీశ్రీ”లో భాగస్వామి అయ్యారు.
ఈ సినిమాకు ప్రిన్స్ మహేష్ బాబు వాయిస్ ఓవర్ ఇవ్వనుండడం మరో స్పెషల్ ఎట్రాక్షన్. ఈ సినిమా ఆడియోను ఈ నెల 18వ తేదీన దాసరి నారాయణరావు, మహేష్ బాబు చేతుల మీదుగా విడుదల చేయబోతున్నారు. “మహాకవి శ్రీశ్రీ రచనలు ఓ సామాన్యుడిలో స్పూర్తిని రగిలిస్తే, అతని జీవితం ఎలా ఉంటుందనేదానికి రూపమే ఈ చిత్ర కధ అని, వర్తమాన సమాజాన్ని ప్రతిబింబించేలా ఈ సినిమా ఉంటుందని” చిత్ర యూనిట్ తెలిపింది. మార్చిలో ఈ సినిమాను ప్రేక్షకుల ముందుకు తీసుకువస్తున్నారు.
